Friday, March 28, 2014

Ika-sampu



Muli nating pagniningasin ang gabing ito.
Muli nating sasamantalahin ang pagkakataong tayo'y magkasama.
Ubusin natin ang oras na tanging mga mata lang natin ang siyang nag-uusap, hahayaang ang ating mga labi ang gagawa ng paraang sila'y magkalapit at 'di pipigilan ang ating mga katawan ay magkasupong sa buong magdamag.

Pag-ibig ang lenggwaheng ating naiintindihan at ito rin ang dahilan upang tayo'y hindi nagkaunawaan.
Pag-ibig ang nagtagpo sa ating dalawa at ito rin ang siyang nagpahiwalay sa ating kapalaran.
Pag-ibig ang nagbigay kahulugan sa ating buhay datapwat ito ngayon ang naglalagay sa atin sa posibleng kapahamakan.

Mahal kita. Mahal mo ako.
Minahal kita. Minahal mo ako.
Ngunit sadyang may mga bagay na hindi natin kayang panghawakan.
Ginawa mo nang lahat ngunit hindi pa rin sumapat.
Pinilit mong unawain ngunit lalo lang gumulo ang sitwasyon.
Nagpakumbaba ngunit hindi pa rin nagtagumpay.

Hindi ito mali noon subalit ngayon, ito'y isang malaking kasalanan.
Gaya ng isang lulong at sugapa sa droga, hindi nagpapapigil sa paggawa ng kamalian.
Hinihiram natin ang gabing hindi naman sa atin. Ninanakaw natin ang sandaling nararapat na para sa iba.
Tila lahat ay ating kalaban, tila lahat sa atin ay 'di sumasang-ayon.
Balakid ang oras,  hadlang ang mga tao, katunggali ang mundo, tutol sa'tin ang tadhana.
Higit pa sa sugal ang ating ginagawa dahil buhay at dangal ang atin ngayong ipinauubaya. Ngunit hindi natin ito alintana dahil mas nangingibabaw ang ating pagnanais na tigibin ang uhaw nating pagmamahal. Wala tayong pakialam dahil mas ninanais nating umumit ng kaligayahang panandali sa daigdig nating balot ng kalungkutan at pagsisisi.

Minsan tayo mismo ay hindi na sumasang-ayon, minsan tayo mismo ay nagtatanong, ngunit madalas pinababayaan lang nating tayo'y magpatianod sa agos ng kapangahasang ito.
Masarap nga siguro ang bawal dahil sa tuwing ating ito'y nilalasap hindi tayo nag-aalala sa panganib na sa atin'y haharap. Ngayon, nauunawaan na natin kung bakit marami ang nalulubog sa kasalanan, kung bakit marami ang hindi makatanggi sa pagkakamali at kung bakit hindi sila nararapat na husgahan.

Batid ko noon, ako'y nakatakda para sa iyo at ikaw ay itinakdang makasama ko.
At katulad ng pangako ng kapayapaan, isa lamang itong kasinungalingan.
Marami ang nangyaring hindi natin ginusto ngunit ginawa pa rin natin.
Maraming sandali ang ating sinayang ngunit hindi natin ito pinanghinayangan.
Maraming pagkakataon ang nagbukas ngunit hindi man lang tayo nagparaya.
Kaya tumungo ang lahat sa ganito.

Gago ako nang mga sandaling hinayaan kitang umiyak.
Bobo ako nang mga sandaling pinabayaan kitang lumisan.
Tanga ako nang mga sandaling hinayaan kitang masaktan.
Naging manhid ako sa lahat ng iyong pakiusap at paghihirap.
Ngunit pagkatapos nang lahat ng ito...nandito ka.
Pinagsasaluhan natin ang isang bawal na kailanman'y hindi naman nararapat, kailanman'y tila walang katumbas na kapatawaran.

Lipas na ang aking 'patawad' dahil sinasang-ayunan mo ang isang kamalian.
Lampas pa ito sa pag-ibig dahil umabot na ito sa pagiging makasarili.
Lunas sa pagsisisi ang sapantaha natin sa ganitong uri ng kapangahasan.

Ngunit,
Alam pa ba natin ang mali?
Batid pa ba natin ang tama?
Tila pareho na lang ito sa paningin ng tulad nating patuloy na binubulag ng bawal na pagmamahal. Wala na itong pagkakaiba sa tulad nating patuloy na minamanhid ng labis na pag-iibigan.

Habang pinagniningas natin ang ating gabi.
Habang sinasamantala natin ang pagkakataong tayo'y magkasama.
Habang inuubos natin ang mga oras na mga mata natin'y nag-uusap.
Habang abala ang ating mga labing 'di tumitigil na maglapit.
Habang 'di nagsasawa ang ating mga katawang magkasupong sa kabuuan ng magdamag.

May mga buhay na winawasak dahil sa ninanakaw na sandali.
May mga pusong umiiyak dahil sa pag-ibig na pinagtataksilan.
Paulit-ulit.
Walang pagkasawa.
Walang pagsisisi.

Paulit-ulit.
Walang pagtigil.
Walang paglubay sa pagsuway sa sagradong ika-sampung utos. 

12 comments:

  1. Matagal ko nang napapansin na karamihan ng post mo sa FB ay tungkol sa cheating. I can't help but think na you experienced this na, and in a very bad way. Is this post fiction or not? Anyway, solid pa rin ang pagsusulat mo Kuya Ramil. :)

    ReplyDelete
    Replies
    1. Ay hindi naman, ang dami lang kasing pwedeng maisulat tungkol sa pagtataksil parang unli ang ideas. Napanood ko kasi last week yung movie na 'iisa pa lamang' ni dawn at richard, tungkol 'yun sa cheating husband more or less 'yan ang mga nasa isip nila, siguro.
      It's a fiction pero we're sure nangyayari ito in real life.
      'Wag ka na gaano mag-isip hindi ito nangyari sa akin. Hehe.

      Thanks geosef hanggang sa muling pagtataksil! Haha

      Delete
    2. Ah buti naman at wala kang ganong experience. Lusog talaga ng utak mo. *nyahaha*

      Delete
  2. Husay talaga...parang nangilid ang luha ko habang nagbabasa. Tila nakikita ko sa harapan ako ang lahat. Kumirot ang puso ko doon ah. :D

    ReplyDelete
    Replies
    1. Siguro may naiisip kang tao na nakakarelate dito. Haha.
      Salamat sa dalaw ms jemaima itigil ang pagluha muling damputin ang pluma at sumulat ng kumnwari'y makata.
      Kidding aside, ang mga taong involve sa pagtataksil walang pakialam sa tama o mali basta mapunan lang ang tinatawag nilang 'pag-ibig' kahit makasakit sila ng iba, patuloy pa rin sila.

      P.S. Magiging defensive ako ulit, hindi ko story yan. :) haha

      Delete
    2. Kailangan lang baka mabatukan eh. :-)

      Delete
  3. Naghigpit ang kalamnan ko. Kating-kati akong magyosi pagkatapos nito upang pigilin lamang ang pagtakas ng mga luha. Bago ako tumayo, isang malaking P****I** po, Sir. Pwede mo akong pektusan pag nagkita tayo, pero sa ngayo'y hayaan niyo lamang ako ----

    May pinagdadaanan eh.

    Ilang beses ko bang sasabihin na sakit at pagdurusa ang naguugnay sa karamihan? Mas malalalim ito sa mga panahong puno ng kasiyahan, dahil ang kalungkutan ay mga butong tatanim at iinid sa puso ng isa, tutubo at aabot sa utak ng iba.

    Kinakanti ako ng post mong ito, nakanang p*ta.

    Pasensya sa umuulang mura. Kelangan ko pa bang sabihin na masyado kang mahusay tumapik ng mga damdaming pilit ikinukubli sa araw? Alam mo na siguro iyon, Sir.

    ReplyDelete
    Replies
    1. oks lang magmura, alam ko naman hindi 'yan patungkol mismo sa akin.
      pansin kong marami ang may pinagdadaanan ngayon, sana hindi umaayuda sa kalungkutan ang post na ito. may mensahe pa sa likod ng sanaysay na magmumulat sa nakakarelate sa paksang ito.

      may utang ka sa aking isang pektus, ms essay. haha. biro lang.

      salamat sa dalaw :)

      Delete
  4. sabi nila walang mali sa Pag-ibig... nagiging mali lamang to pag may nasasaktan ka, may inaagawan at may winawasak. Ika sampung utos, nasusuway to gamit ang isip lamang, o ang salita ngunit ang mabigat ang pagsasanid ng isip at gawa. Galing mong humabi Sir Ramil.. wala ka pa ring kupas.

    ReplyDelete
    Replies
    1. para sa akin may mali sa pag-ibig, lalo na 'pag ito ang ginagawang dahilan para makapangloko at makapag-take advantage ng kapwa.
      para sa akin may mali sa pag-ibig, ayaw lang nating aminin.

      Delete
  5. siguro dahil ang salitang pag-ibig kahit di sya isang bagay, kung makabulag wagas.

    ReplyDelete