Friday, January 25, 2013

The Eraserheads Chronicle 3/4




Sa taglay na kasikatan ng banda hindi lang sa bansang Pinas kabilang na rin ang karatig bansa sa Asya naglabas sila ng album target ang kanilang fans sa Asya ang "Aloha Milkyway". 14 Tracks; siyam na remastered tracks at limang orihinal na tracks. Sa limang orihinal na tracks na narito hindi ko pinagsasawaang pakinggan ang "Scorpio Rising" ibang-iba ang kantang ito sa mga naunang komposisyon ng grupo bihira din nila kantahin ito sa kanilang mga gig ewan ko kung bakit. Kahit nga sa kanilang dalawang Reunion Concert ay hindi nila ito isinama. Sa lupit ng guitar at drum solo ng kantang ito mapagkakamalan mong isang foreign band ang tumutugtog nito.

Sa ilang taon lang na pagtugtog ng grupo hindi na mabilang ang kanilang mga achievements, awards, naitalang record at ang pinakaimportante ang buhay na kanilang pinasaya; oo nga't musika lang ang inihandog nila ngunit higit pa rito ang ibinigay nila sa kanilang tagahanga. Hindi biro ang gumawa ng kanta na magugustuhan at mamahalin ng masa, para sa iba madali ang gumawa ng kanta ngunit ito ba'y tatanggapin ng mapanuri at mapanghusgang lipunan? At lahat ito'y nalagpasan ng grupo dumaan din sila sa hindi magandang simula tulad ko at ng maraming tao; hinusgahan, hinamak at minaliit ang kakayahan ngunit hindi sumuko at lalong nagpursigi na makamit ang pangarap.

Napatunayan din nila na hindi mo kailangan ng napakaganda at napakataas na boses para maging matagumpay sa industriya ng musika, hindi mo kailangang maging ubod ng gwapo para magustuhan ng masa, hindi mo kailangang magsuot ng magagarang damit para tangkilikin ng tagahanga, ang kailangan mo lang ay talento at pagmamahal sa larangang iyong nagustuhan kung wala ka nito hindi ka pa sumisikat malalaos ka na.

* * *
Natin 99 - obviously ay inirelease ng taong 1999. Ipinakita rito na ang ibang miyembro ng Eheads ay mahusay din sa paglikha ng awitin dahil ito ang album na mas kakaunti ang nai-contribute na kanta ni Sir Ely kumpara kina Raimund, Marcus at Buddy.
Mula sa tunog techno at electronic na album na Sticker Happy, ang Natin 99 naman ay tunog Manila Sounds - tunog 70's. Kakaiba. Tunay ngang hindi tumitigil ang Eheads sa pagpapahusay sa kanilang naibigang craft. Bumalik ang sigla at saya ng kanilang mga kanta sa pamamagitan ng album na ito.

Wala na silang dapat patunayan pa. Mula sa pagiging bagito nila sa pagtugtog ng instrumento naging isa silang propesyonal na halos lahat ng instrumento'y kanilang sinubukan. Hindi natakot mageksperimento, hindi nagpatali sa panuntunan ng industriyang kanilang ginagalawan. Dahil sa karamihan sa mga kantang narito ay hindi composition ni Sir Ely iba ang naging dating nito sa mga tao. Ibang-iba. Hindi man kumita ng napakalaki ang album na ito hindi rin naman ito lumagapak. Ano kaya ang nasa isip ni Sir Ely ng panahong ginagawa ito? Bakit kakaunti ang contribution niya sa album na ito? Nag-uumpisa na ba siyang tabangan sa paggawa ng malulupit na mga kanta? O saan siya nagsasawa, sa pagku-compose o sa mga kasama niya sa grupo? Ewan ko, hindi ko alam. Pwede bang 'wag na lang nating pag-usapan?
* * *
Mayroon akong weird feeling na kapag naglabas na ng Greatest Hits Album ang isang artist malamang papunta na ito sa pagkakawatak-watak o paglamlam ng kanilang kasikatan. Nang mapakinggan at ninamnam ko ang mensahe ng kantang "Para sa Masa" parang pahiwatig na rin ito ng kanilang pamamaalam sa mga fans na karamihan ay Masa. Ang kantang ito'y katumbas ng "Handog" ni Florante na isa ring pasasalamat at farewell song. At nang inilabas ang Eraserheads: The Singles noong year 2000 nakikita ko nang papunta na sa sukdulan ang ang kanilang pagsasamahan bagamat mayroon pa silang isang album na inilabas pagkatapos nito, ang Carbon Stereoxide ng taong 2001. Maaring hindi nila alam na ito na ang kanilang huling studio album as a band pero more or less alam nilang iba ang magiging pagtanggap ng tao sa album na ito.

Hindi maiko-compare ang Carbon Stereoxide sa kanilang mga previous album dahil malayong-malayo ito sa mga ito. Ipinakita rito ng Eheads na may iba pa silang kayang gawin bukod sa pop-rock music kung saan sila nakilala. Kung hindi ka die hard fans ng Eheads malamang hindi mo magustuhan ang ilan sa mga kantang nakapaloob dito bagamat okay naman ang Maskara at Pula parang hindi ka naman makakarelate sa ibang mga songs dito. Personally, gusto ko ito dahil sa medyo malalim at mabigat ang compositions dito pero hindi iyon ang gusto ng maraming fans kaya hindi ito gaanong nag-hit sa music charts at di rin gaanong nagclick sa masa.

Kung tutuusin wala naman nang dapat pang patunayan pa ang grupo dahil lahat na ng gustong makamit ng sinumang artist ay nakuha na nila; awards, fame, fortune, hits, popularity, respect at sandaling panahon ng kanilang pagtugtog itinuring na silang Icon at alamat. Kung magdisband man sila wala na rin silang dapat pagsisihan pa; ang kontribusyon nila sa daigidig ng musika ay mahirap nang pantayan ninuman sa maraming kadahilanan.

At nang magising ako ng isang umaga ng taong 2002 nakarating sa kaalaman ko na tuluyan na ngang nagdisband ang bandang Eraserheads nalungkot ako pero hindi na rin ako nagulat. Papunta naman ang lahat sa ganoon. Kung hindi ka na komportable, kung hindi ka na masaya mas mabuti ngang siguro humiwalay ka na; pero alam ko may malalim na kadahilanan kung bakit nagdesisyon si Sir Ely na iwan ang kanyang bandang naghatid sa kanya sa pagyaman at sa kasikatan. Sa katunayan sa pagkawala ng Eraserheads mas lalo kong na-appreciate ang mga kanta nila. Na hindi lilipas ang buong linggo na hindi ako makikinig ng isa sa mga album nila. Tunay ngang kahit anong gawin lahat ng bagay ay mayroong hangganan. Kaya lang alam kong may malalim na kadahilanan pa kung bakit humiwalay sa grupo si Sir Ely kung hindi ba naman bakit sa isang text message lang tatapusin ang higit sa isang dekadang kanilang pagsasamahan? At hindi lang unprofessional-ism ang dahilan nito.



The day the music died - isa itong linya sa malupit na kantang American Pie ni Don Mclean sinulat niya ito bilang tribute sa mga namatay na miyembro ng Buddy and The Hollies sanhi ng isang plane crash. Sa ganito ko rin nais ipahayag ang aking naramdaman nang magdisband ang grupo - The day the music died. Bagamat may mangilan-ngilan pa ring gumagawa ng matitinong kanta hindi naman maitatanggi na mas malakas ang karisma ng Eraserheads kumpara sa iba. Mabuti na lang at hindi pa nadidisband ang Parokya Ni Edgar (minus Vinci) mayroon pang isang dahilan para makinig ng OPM.
 

Wednesday, January 9, 2013

Hayop at Metapora




Isa akong ibong tinatangay at inililipad ng pangarap
Ikakampay ang bagwis kung saan ito magaganap.
Isa akong isdang 'di kayang lunurin ng suliranin
Anumang mithiin ay pagsusumikapang languyin at sisirin.

Isa akong tandang na matapang na haharap sa maangas na kalaban
Ibabaon at itatarak ang taring matalas sa magtatangkang humarang.
Isa akong inahing 'di mapapagod na kakahig para sa aking mga alaga
Maagang pupungas at puputak upang humanap ng makakain at matutuka.

Isa akong buwayang tahimik ngunit puspos na mapanganib
May kakayahang mabuhay mapadpad man sa lupa o sa tubig.
Isa akong hunyango na may huwad na balat at kulay
Ako'y magbabalat-kayo anumang sandali para lang mabuhay.

Ako'y isang pagong na mabagal at maingat kung kumilos
Magalang na iyuyukod ang ulo sa lahat ng karespe-respeto.
Ako'y isang tarsier na 'di kaibig-ibig sa iyong mata
Gigisingin ko ang bawat gabi habang pinupuyat ko ang umaga.

Ako'y isang kabayong paulit-ulit na tatakbo para makamit ang panalo
Walang sawang lalahok sa kompetisyon hanggang mabaldado.
Ako'y isang ulupong na gagapangin ang bawat pagkakataon
Tutuklawin at lilingkisin ang sinumang maghahamon.

Ako'y asong-gala na lalaboy upang humagilap ng makakain
Kakaholan at aambahan ng pangil ang aagaw sa'king adhikain.
Ako'y pusang-kalyeng maliksing gagalaw at kikilos
Lalamunin at lulununin ang tinik ng aking bawat pagsubok.

Isa akong daga na may angking talino at bilis
Iiwasan ang kaguluhan ngunit lumalaban kung tinutugis.
Isa akong elepante na 'di kayang igupo ng problemang dumarating
Ipakikita kong ako'y dambuhalang makakamit ang bawat na mithiin.

Isa akong tigreng taglay ang matalim at matulis na mga pangil
Ito'y aking babala sa may pagnanais na pumigil at sumikil.
Isa akong matapang na leon na diyos ng sarili kong kagubatan
Handang lapain ang magtatangkang sumakop sa aking kaharian.

Isa akong langgam na magsisikap at mag-iipon sa tuwing may araw
Upang may maihain at makain kung sasapit ang panahon na maulan.
Isa akong magandang paruparo na may pakpak na makukulay
Sisimsim sa mabangong nektar ng bulaklak upang mabuhay.

Ako'y isang hayop na may makataong pag-aasal
Marunong mangarap, marunong gumalang, marunong magdasal.
Isa akong taong taglay ang karakter ng isang hayop
Marunong magsikap, marunong lumaban, 'wag lang maghirap at magdahop.

Saturday, January 5, 2013

Ligaw na Bala



Gabi ng Disyembre 31. Nabalot ng lungkot ang dapat sana'y masayang pagsalubong at pagdiriwang ng Bagong Taon nang magmula sa kalangitan ay may balang ligaw na sumapul at kumitil sa inosenteng anghel na si Stephanie Nicole Ella. Sa isang isang iglap ay may ninakawan at pinagkaitan ng pag-asa, ng pangarap, ng kinabukasan at ng buhay...ng isang walang puso, hindi kilala at walang mukhang salarin.

Habang may isang demonyong nakangisi at nagsasaya dulot ng kanyang walang pakundangang pagpapaputok ng baril, may isa namang pamilya na ngayo'y dumaranas ng matinding kadalamhatian. Tumatangis at nagtatanong sa langit.
Habang may isang tarantadong humihiram ng huwad na kasiyahan sa tunog ng kanyang palalong baril, isang palahaw ng iyak ang umalingawngaw mula sa amang nagugulimihanan sa sinapit ng kanyang anak. Humahagulgol at nagtatanong ng "Bakit?"
Habang may isang mayabang na nakatindig sa kanyang kagaguhan at kairesponsablehan, may isa namang batang humandusay at kinitilan ng pag-asang mabuhay. Na ngayo'y kumakatok sa pintuan ng Langit.

Paano natin makuhang magsaya gayong alam nating anumang sandali ay mahahagip tayo at sinuman sa ating mga anak ng ligaw na bala?
Paano magsasaya at magdiriwang ang pamilya ng biktima na naiwan kung sa umpisa pa lang ng taon ay isang malagim na trahedya ang sa kanila'y sumalubong?
Paano naatim ng ibang taong magpaputok ng kanilang baril gayong alam nilang maaari itong kumitil ng buhay at pangarap?
Sa papaanong paraan sila nakakakuha ng kaligayahan kung ang umalagwang mga bala ay tutugis sa mga inosenteng nais lamang ay sumaya at magmasid?

Taon-taon. Paulit-ulit ang panawagan na huwag magpapaputok ng baril sa selebrasyon at pagsalubong ng bagong taon. Ano ba ang mapapala natin dito? Hindi hamak na mas malakas pa ang putok ng isang 5 star kaysa sa putok ng 9mm o kalibre 45 pero sadyang hindi maawat ang ubod ng yabang na may tangan ng baril. Hindi ko makuha ang lohika at dahilan sa likod ng walang habas na pagpapaputok ng baril sa tuwing bagong taon sa kabila nang pagkakaalam nila na posibleng may madisgrasya sa ganitong kairesponsablehan. Tangina. Kayabangan lang ba ang iyong dahilan para gawin mo ito? Ngayong nagawa mo na ito, nalubos ba ang kasayahan mo? Sagad ba sa tuwa ang naramdaman mo nang sumahimpapawid ang mga punglong iyong inutusang lumipad? Hintayin mo ang ganti at galit ng Langit.

Sana sa susunod na taon ikaw na mismo ang tamaan ng sarili mong punglo, itutok at iputok mo ito sa iyong sentido, hindi ito maligaw at tumagos sa iyong katawang may sanib ng kahambugan at nang maramdaman mo ang sakit, hapdi at init na unti-unting bumabaon sa iyong walang silbing kalamnan. Walang puwang ang tulad mo sa mundong naghahanap ng katiwasayan at kapayapaan.
Natupad na ang gusto mong magpaputok ng baril, nabawasan pa ang isang taong tulad mo na halang ang kaluluwa.

Hindi sapat ang salitang IRESPONSABLE para iuri ang mga ganitong tao. Sila'y mga pusakal na kriminal na walang awa at walang kaluluwa na walang iniisip kundi ang sariling pagkasiya. Alam ba nila na sila'y nagnakaw na ng buhay? Hindi, dahil wala silang pakialam. Hindi ba sila naaawa sa pamilyang iiwanan ng inosenteng kanilang mabibiktima? Hindi, dahil inosente rin ang tingin nila sa kanilang mga sarili.

Sana habang itinututok at ipinuputok nila ang kanilang baril sa langit, isipin nilang baka matamaan at mahagip ng bala nila ang kanilang mga anak o mahal sa buhay. Sana maisip nila na sa bawat balang kanilang pinakakawalan katumbas din ito ng isang buhay na kanilang uutangin. Kung may natitira ka pang konsensya at bait sa iyong katawan sana ay sumuko ka  na upang mapagsisihan at mabigyang katarungan ang isang imortal na kasalanan.
Sana hindi lang ito isang sensesyonal at kontrobersyal na balita na pinagpiyestahan at sinakyan ng mga pulitiko at media.
Sana ito na ang huling balitang may tinamaan ng ligaw na bala na may kaugnayan sa pagdiriwang ng isang masayang bagong taon.

Tuesday, January 1, 2013

Paano maging Imortal?




Habang sinusulat ko ito ay hindi pa nadidiskubre ang fountain of youth o anumang bagay na makakapagpalawig ng husto ng buhay ng tao. Mayroon akong Gerontophobia at katulad ng marami, nais ko ring mamuhay na taglay ang kutis at balat na hindi nakaluyloy, walang pileges ang noo, hindi paika-ika ang lakad, walang makapal na antipara at may alistong kilos na pisikal at pag-uutak. Alam kong malayo ito sa katotohanan at malabong mangyari at maganap sa hinahaharap tulad nang pagkalabo ng tubig na nasa masukal na kanal dahil lahat tayo ay nakatakdang humina at tumanda. Gusto kong isipin na ang katandaan ay parusa ng langit sa lahat ng kasalanang ating nagawa noon ating kabataan.

Gusto kong maging imortal (hindi imoral) hindi dahil takot ako sa kamatayan kundi dahil gusto kong malasap pa ang sarap ng buhay. Sa average life pan ng tao na 70-75 years old naiiklian ako dun, gusto kong mamuhay ng higit sa isang-daan taon pero hindi uugod-ugod; sa ganoong edad sana’y hindi pa lipas ang aking pagiging matikas, hindi pa laos at paos at hindi pa tinatalo ng antok ang libog. Ngunit paano ba maging imortal? May paraan ba para maging tayo’y mamuhay nang pagkatagal-tagal kung hindi man imortal?

Ito ang ilan sa mga tip na aking nakalap para tayong lahat ay maging "Imortal".

  1. Kailangang makita mo ang iyong crush sa loob ng isang araw. May nabasa ako sa internet; sabi daw sa Reader’s Digest sa tuwing makikita mo ang crush mo ay nai-extend ang ating buhay ng apat na oras; alam naman natin hindi ito totoo pero for the sake of humor paniwalaan natin ito. Halimbawang consistent natin itong ginawa sa loob ng isang taon; nadagdagan ang buhay natin ng 60 days. Heto ang formula: 4 hours@365 days = 1,460 hours divided by 24 = 60.833 days. Kung may katotohanan ito, marami-raming araw/taon ding karagdagan sa buhay natin ‘yan.
  2. Huwag Magsigarilyo.  Hangga’t may panahon itigil ang paninigarilyo dahil ang hindi raw paninigarilyo ay nakapagdadagdag ng ating buhay ng humigit kumulang sampung taon! Kung ang average life span ay  70 years old magiging 80 years old na ito dahil hindi ka naninigarilyo. Dito galing ang source. CLICK.
  3. MAGKONTROL sa pag-inom ng anumang uri ng alak. Ang mga taong talamak sa pag-inom ng alak ay bawas ang haba ng buhay ng higit sa labing-limang taon at kung minsan ay aabot pa ito sa dalawampu depende sa pagka-adik. Ngunit ang pag-inom naman nang katamtaman ay nakakatulong daw sa ating kalusugan. Kung nais mong mabuhay ng mas matagal dapat hinay-hinay lang sa paglaklak dahil imbes na 70 years old ang itagal mo sa earth baka hindi ka pa umabot ng limampu. May karagdagang impormasyon dito:  CLICK.
  4. Magkaroon ng regular na exercise nang at least 150 minutes every week. (+7.2 years). CLICK. 
  5. Limang paraan pa para magdagdag ng 22 years sa buhay mo:  
      • Kung alukin ka ng “soup o salad”? Salad ang piliin mo. (+2 years)
      • Ang labis na tabang nasa katawan mo ngayon ay maaring kumitil ng buhay mo bukas (+3 years)  
      • Ngumuya at kumain ng nuts (walnuts, almonds, peanuts, etc.) limang beses isang linggo (+3 years)
      • Magkaroon ng marami at matinong kaibigan (+ 7 ½ years) 
      • “May buhay pa pagkatapos ng Retirement” – mentalidad na dapat isaisip makalipas mag-retire (+7 ½ years)   
    • Ni-research ko 'yan dito. CLICK. 
  6. Maging vegetarian. Ang pagkain daw ng literal na karne ay risk sa iba’t ibang sakit samantalang ang pagiging vegetarian (isama na natin ang prutas) naman ay nakakapagdagdag ng halos sampung taon sa iyong buhay! Ang dami nun. Basahin mo ito:  CLICK.
  7. Ilan pang simple at di-simpleng tips/pag-aaral na makakapagdagdag taon di-umano sa ating buhay.
      • Matulog ng sapat lang (six to eight hours). 
      • Humalakhak at tumawa. 
      • Watch your weight. 
      • Have lots of children. 
      • Mag-aral mag-piano. 
      • Maging optimistic. 
      • Mag-develop ng espesyal na relasyon/closeness sa iyong ina. 
      • Patuloy na mag-aral. 
      • Be health conscious take regular physical check-up. 
      • Enjoy Chocolate. 
      • Mag-tsaa imbes na kape o cola. 
      • Mag-relax. 
      • Huwag dalhin ang trabaho sa bahay (lalo kung embalsmador ka). 
Walang sinabi kung ilang taon ang maidadgag kung lahat ito ay magagawa mo pero paniguradong makakatulong ito sa pagnanais mong maging "imortal". May dagdag pang kaalaman dito: CLICK.  
8. Mag-alaga ng hayop; i.e. aso, pusa, isda, etc.- Nakakabawas daw ng depresyon ang pag-aalaga ng hayop; nakakapag-reduce din daw ito  ng blood pressure. (+2 years) may tatlo akong aso sa ngayon ibig sabihin may anim na taong karagdagang buhay. :-)
9. Alam niyo ba na ang magtrabaho daw sa isang maganda, kontento at komportableng workplace lalo na ang kwartong may magandang tanawin ay nakakapagdadag din ng buhay? Mahirap nga naman magrabaho kung nakakairita sa mata ang iyong palaging nakikita. (+2 years)
10. Make your marriage work. ‘Pag tunay na pagmamahal ang nananahan sa puso ninyong mag-asawa ma-a-outlive mo daw ang mga taong divorced, widowed o unmarried. Ayon sa pag-aaral, mayroon din daw kapasidad na mag-survive sa cases ang happily married couple. (+7 years)  
Ang detalye at impormasyon sa 8-10 ay galing dito. CLICK. 
11. Ito ang pinakapaborito ko: MASAGANANG SEX LIFE. At least 100 good sex encounter per year can increase life expectancy by 3 to 8 years. Akalain mo ‘yun nag-eenjoy ka na sa sex may benepisyo ka pang makukuha! HUWAG mo lang gagawin ito sa asawa ng iba dahil imbes na humaba ang buhay mo tiyak na mapapadali ito. Basahin mo ito. CLICK. 
12. Ang pinakahuli ngunit PINAKA-importante. Find GOD. Have Faith. Scientist na ang nagsabi na ang mga aktibo sa religious service & activities at least once a week ay 35% na higit ang haba ng buhay sa kulang sa paniniwala at pagmamahal sa Diyos. (+7 years) Maniwala ka dito. CLICK. 

Kung susumahin at gagawin mo ang lahat ng mga nasa itaas; hindi ka man maging literal na imortal kahit papaano ay madadagan ang haba ng iyong buhay. Ngunit sa dinami-dami ng dapat nating gawin at sundin malamang hindi mo na rin ma-enjoy ang saya at sarap ng buhay at katulad ng ating buhay ang marami sa mga nasa itaas ay hindi simple dahil nangangailangan ito ng matinding disiplina sa utak, emosyon at katawan.

Hindi naman natin kailangang mabuhay ng pagkatagal-tagal kung nabubuhay ka lang para sa sarili mong kasiyahan. Hindi natin kailangan ng mahabang buhay kung nabubuhay ka na puno  ng galit at paghihimagsik at hinanakit ang puso mo. Ayos na siguro ‘yung nabuhay ka ng hindi gaanong mahaba per ito’y payapa at puno ng pagmamahal sa kapwa. Kung nagawa natin ‘yun higit na kapayapaan at pangarap na imortalidad ang maghihintay sa atin sa kabilang buhay.