Monday, April 28, 2014

What May Ease Your Loneliness



(Ang artikulong ito ay tugon at karugtong ng akdang "What makes you lonely")

At pagkatapos mong makaranas ng kapighatiang halos tumungo sa depresyon at desperasyon o makalipas ang mga sandaling pagmumuni at pagsisisi sa mga bagay na hindi dapat nangyari at sa pagtila ng ilang araw at gabing pagtangis na halos ikatuyo ng iyong luha at ikawala ng katinuan, panahon na upang malampasan mo ang kalungkutang posibleng baka maging susi at sanhi pa ng pagkasira ng iyong buhay at kinabukasan.


Lahat tayo may kanya-kanyang problema, depende na lang sa atin kung paano natin ito mahahandle at mariresolve, hindi mo alam 'yung taong kaharap mong malakas tumawa o akala mong perpekto ang buhay ay may mabigat pala na problema pa kaysa iyo. Walang perpektong buhay, lahat ay may kakulangan, pag-aralan natin kung paano maging kontento sa kung ano ang nasa posesyon natin at ipinagkaloob sa atin. Be thankful, be grateful, isipin natin na may mga taong mas mabigat pang suliranin kaysa sa atin.


Ang mga sumusunod ay ilan sa mga suhestiyon upang maibsan o mabawasan, kung hindi man tuluyang mawala ang dinaranas na pighati; mga pananaw na maaaring makatulong upang kahit papaano'y makaiwas sa kalungkutan o depresyon.


1.       Right perspective - Maraming bagay na dumadating sa ating buhay na hindi natin alam ang kahulugan at layunin nito sa atin ngunit pagkatapos mong malampasan ang lahat ng pagsubok, pagkatapos nilang lumisan sa ating buhay asahan mo 'yung mga bagay na noon ay iniyakan mo ang magpapangiti sa'yo sa pagdating ng panahon. Mahirap unawain ang mga problema, mga problemang halos ikabaliw at ikasuko mo na, ngunit katulad ng kaligayahan bahagi din ang kalungkutan ng ating buhay. Totoong ang pagiging positibo ay hindi lubusang nakakaresolba ng problema ngunit malaki ang naitutulong nito upang magpursigi kang labanan ang nakahambalang na suliranin at kung sakaling mabigo ka naman pinagagaan nito ang iyong pakiramdam at madaling matanggap ang negatibong resulta.


2.       Decide to be happy - palagi nating naririnig ang katagang 'happiness is a choice', maniwala ka totoo ito. Kung gugustuhin mong maging maligaya kahit marami kang tanong sa buhay pwede ito, maaari kang ngumiti sa kabila ng iyong mga agam-agam. Minsan ang mga problemang kinakaharap natin likhang isip lang din; bakit pinoproblema natin na luma ang gadget o celphone natin? Bakit pati ang kakulangan mo sa wikang ingles problema pa rin? Narealize mo ba na kaya may problema kang pinansyal dahil lampas ang iyong gastusin kumpara sa iyong kinikita? Ang inggit ay pumapatay ng appreciation habang binubuhay naman nito ang lungkot na hindi naman kailangan. 'Wag magpatalo sa kalungkutan, hindi ka lulubayan nito kung ayaw mo siyang iwanan. Kung hinayaan mo ang iyong sarili na maging malungkot umaga pa lang, mas malamang na ang buong maghapon mo ay malungkot na rin at damay na rin ang mga taong nakapaligid sa'yo. Ang pagiging malungkutin ay nakaka-attract ng negatibo, samantalang nakakaginhawa naman sa pakiramdam ang pagiging masiyahin.  



3.        Accept the truth (embrace the truth) - kahit anong gawin mo hindi mo na kayang bumalik sa nakaraan, kahit anong gawin hindi mo na mababago pa ang nangyari; ang nangyari ay nangyari na, kung hindi mo matanggap na lahat ng bagay ay may dahilan tanggapin mo na lang na ang lahat ng bagay ay may hangganan. Irespeto natin kung ano ang mayroon ang iba at 'di dapat na ito ang maging dahilan ng ikakaproblema mo. In due time, in God's will and with your willingness to strive makakamit mo ang mga bagay na ukol para sa'yo. May mga bagay na sadyang hindi nakatakda para sa atin at katumbas lang nito ay pagtanggap sa katotohanan. Ang pagyakap sa katotohanan ay magpapakawala sa kalungkutang naghahari sa iyong puso.


4.        Love yourself (accept yourself) - sa sobrang focus natin sa ating problema minsan nakalilimutan natin ang ating sarili mismo. Sa paglublob at pagtatampisaw natin sa karagatan ng suliranin hindi natin nakikita ang mga taong nakalahad ang mga kamay para sa atin, silang may pagnanais na tayo'y iahon at sagipin. Sa pagwawalang bahala natin sa ating sarili hindi natin napapansin ang mga taong nagmamahal sa atin ay nadadamay na rin sa problemang iyong pinagpaparausan, kung silang nagmamahal sa iyo ay tanggap ka bilang ikaw marapat lang din na tanggapin mo ang lahat sa iyong sarili; ang iyong kahinaan, ang iyong kapintasan, ang iyong kakulangan at ang mga naging pagkakasala. 'Pag muli mong tinanggap at minahal ang iyong sarili, marirealize mong may igaganda pa ang buhay na kinakaharap mo ngayon na kesa magmukmok ka sa kaiisip ng problemang overdue, mas okay na kalimutan na ang negative vibes, ang pagsiself-pity and it's time to moved on with your life.


Hindi nga madaling dumaan sa emosyong kalungkutan ngunit hindi rin naman dapat na ito't winawalang bahala at pinatatagal. May oras para malungkot at may oras para iwanan ito at gawing masaya ang iyong buhay lahat tayo ay deserve ito. May oras para sa pagluha may oras para sa walang kunwaring pagngiti. May mga bagay na hindi natin kayang kontrolin lalo na ang oras at pag-iisip ng iba, minsan kahit gawin mo ang pinakamainam na paraang alam mo hindi pa rin aayon ang resulta sa gusto mo, may mga tanong na hindi natin kayang sagutin ngunit ang buhay ay hindi nakadisenyo upang sagutin ang LAHAT ng gusto nating malaman at makamtan ang LAHAT ng ating naisin at gustuhin.
At kahit ano pa ang iyong pinagdadaanan ikaw at ikaw pa rin ang makalulutas kung paano at kailan mo matatakasan ang kalungkutan.

Friday, April 25, 2014

'The Legal Wife' Insights



Mapaaraw o gabi, may mababasa ka sa newsfeed ng FB mo tungkol sa #TheLegalWife;  mga maaanghang na linya ng mga character nito, mga nababanas kay Adrian, mga hater ni Nicole, mga nakikisimpatya kay Monica at reaksyon sa nakaraang episode ng teleserye. Kaya kung hindi ka tagasubaybay nito mapipilitan ka na ring alamin kung ano ba 'yung pinagsasasabi nila sa kanilang wall.
- - - - -


Patuloy na tumitrending at tumataas ang rating ng teleseryeng 'The Legal Wife' ng ABS-CBN, bida rito ang mag-asawang sina Adrian (Jericho Rosales) at Monica (Angel Locsin) at ang kalove triangle na si Nicole (Maja Salvador).
Classic story ng pangangalunya at pakikiapid.
Kathang isip na istorya ngunit tunay na nangyayari sa paligid.
Marami ang nakarirelate at marami rin ang in-denial. Basta tungkol sa pagtataksil ang tema mas malamang na mag-rate at mag-hit ang programa at tulad ng 'My Husband's Lover' ng GMA 7, interesting, mapangahas at kaabang-abang ang bawat episode nito (lalo na ang mga love scene nina Adrian at Nicole/Monica).


Kung tutuusin wala namang bago sa palabas na ito, marami nang pelikula, libro, pocketbook, novel, kwento ang ginawa tungkol sa ganitong paksa ngunit dahil hindi nalalaos ang temang 'cheating husband' masidhi pa rin ang pagtanggap ng manonood rito lalo't ang 'other woman' na involved ay ang bestfriend ng asawang babae.

'Wag muna nating isipin na fiction lang ang istorya kunwari'y totoo ito at kakilala natin ang mga character na involved (kunsabagay may bahid naman talaga ng katotohanan ang naturang teleserye). May mga tanong na uukilkil at lulutang na hindi madaling ipaliwanag.



  • Bakit may mga bestfriend 'di umano na nakukuhang pumatol sa asawa ng kanyang kaibigan?
  • May pagmamahal ba sila sa isa't isa o libog lang ang kanilang nararamdaman?
  • Hindi ba sila natatakot sa kahihinatnan ng kanilang relasyon?
  • May tumatagal ba ng forever sa lihim na 'pagmamahalan'?
  • Hindi ba sila kinukurot ng kanilang konsiyensya sa tuwing sila'y magtatalik?
  • Hindi ba sila nag-aalala sa sinisira nilang pamilya?
  • Wala ba sa katinuan ang mga taong involved sa ganitong bawal na relasyon?
  • Nawala na ba ang pag-ibig ng lalaki sa kanyang tunay na asawa?

 
Marami pang tanong na hindi madaling sagutin at hindi madaling maunawaan lalo na 'pag hindi naman natin ito naranasan. Hindi rin madaling sabihin na dapat natin silang unawain dahil may mga tao silang natatapakan. Hindi rin naman makatutulong ang paghuhusga dahil lubhang mahirap ang kanilang pinagdaraanan.


Balik tayo sa istorya; Bakit kahit mahal na mahal ni Adrian si Monica, eh pumatol pa rin siya sa iba sa katauhan ni Nicole?

Sagot: Hindi porke ang lalaki ay may labis na pagmamahal sa kanyang asawa hindi ibig sabihin nito na na hindi siya mahuhulog sa ganda at karisma ng iba, sa kabilang banda hindi porke pumatol ang lalaki sa sa ibang babae hindi na niya mahal ang kanyang asawa.


Masakit man sa tainga at nakasasawa nang marinig ang hinaing ng iba na: 'Bakit ang lalaki 'pag nagloko (cheat) ay okay lang? Then, sa babae ay parang mortal sin at hindi kapata-patawad. Parang unfair 'di ba?
Wala namang matinong tao na nagsabing OKAY ang mambabae dahil kahit ano oang rason, dahilan o katwiran mo ay kasalanan pa rin ito, nagkataon lang na sa lipunan natin nakadaragdag (raw) ng machismo ang pagiging playboy.


Tanggap ng marami na likas na ganoon ang lalaki kaya nga halos walang panghuhusga tayong naririnig sa mga katulad nina Ramon Revilla Sr., Dolphy, Erap Estrada, Joey Marquez at marami pang kilala sa pagiging matinik sa babae. Sabi pa nga ng iba; "men by nature is polygamous" pero marami ring hindi sasang-ayon diyan.


So, anong dahilan bakit nagchi-cheat ang lalaki?
Para sa aking pananaw, ito ang mga posibleng dahilan:


  • sadyang marupok kasi sila na paglabanan ang tukso
  •  madali silang mabighani sa mga magaganda/sexy/malambing na babae
  •  may hinahanap sila na akala nila ay makikita nila sa ibang katauhan
  •  bugso lang ito ng puson at damdamin
  •  nakaka-challenge at nakadaragdag raw ng pagkalalaki ang pagkakaroon ng 'iba'


Take note na 'pag ang lalaki ay nagcheat hindi kailangang may pag-ibig.
Ang mas mapanganib ay 'pag ang babae na ang nagcheat dahil mas malamang na ang dahilan nito ay ang pagkawala o paglamlam niya ng pagmamahal sa kanyang kinakasama/asawa, ibig sabihin kasi no'n may MAS mabigat na problema na ang pamilya. Problemang higit pa sa isyung 'pangangaliwa' lang.


Ang bawat desisyon ay may kaakibat na responsibilidad na hindi dapat winawalang bahala.
Hindi sa lahat ng oras ay pagsisisi lang ang katapat ng isang kasalanan minsan buhay at kinabukasan ang ipinatatalo mo sa hindi pag-iwas sa temtasyon.
Hindi sa lahat ng oras ay maari kang mapatawad at mabigyan ng isa pang pagkakataon dahil para sa iba minsan mas mahalaga ang respeto sa sarili kaysa pagmamahal. May mga indibidwal na labis ang pagpapahalaga sa tiwala na ‘pag sakaling ito na ang masira ay ‘di na kailanman maibabalik pa.


Tulad ng bisyo, ang pag-iwas sa tukso ay kayang kontrolin at iwasan hindi tamang ikatwiran na tayo ay ‘tao lang na nagkakamali at madaling nadadarang’ dahilan lang ito ng mga taong may pagkamakasariling layunin.


Siguro nga masarap ang bawal.
Ang problema, paano kung dumating na ang sandaling ikaw ay mabisto o hindi mo na ito kayang iwanan at iwasan?
Sino ba ang pipiliin at mas matimbang para sa’yo? Ang pamilya mo o ang iyong kalaguyo?
Kaya kayang maresolba ang lahat ng problema sa isang ‘patawad’ lang?

Monday, April 21, 2014

#LDR



Mahal mo siya, mahal ka niya pero kailangan niyong mabuhay nang hindi magkasama hindi para kapwa saktan ang isa't isa kundi dahil ito ang sa palagay niyo ay makakabuti sa kinabukasan ninyong dalawa sampu ng inyong pamilya.


LDR. 
Isang relasyon kung saan hindi mo alam kung ang pagkamiss mo sa kanya ay kapareho ng pagkamiss niya sa'yo, isang relasyong puno ng pag-alala at agam agam, isang relasyong sinusubok at pinagtitibay ng panahon, isang relasyong hinuhubog at pinapanday ng bawat araw upang ito'y mabuwag o manatiling matatag, isang relasyon kung saan ang naiwan at lumisan ay parehong dumaranas ng hindi matatawarang pagtitiis at sakripisyo na dahil sa labis na pagkasabik niyo sa isa't isa minsan pa nga'y may nagiging sanhi pa ito upang pagdududahan ang inyong katapatan.


Hindi dahil nagkalayo pansamantala ay kahulugan na 'yun na 'di na kayo muli pang magsasama ng habangbuhay, hindi dahil hindi kayo magkasama ngayon ay 'di na kayo magkakasama pa sa darating na mga bukas at hindi dahil malungkot ang inyong kasalukuyan ay wala na kayong karapatang gumawa ng maliligayang mga araw.

Minsan kailangan talaga nating isakripisyo at isugal ang ngayon upang mas guminhawa at mapagtagumpayan ang bukas.


Lubhang napakahirap iwasan na ang relasyong magkalayo sa isa't isa ay may bahagyang bahid ng pagdududa hindi dahil sa wala kayong inuukol na pagmamahal kundi dahil sa labis na pagkainip at sa mga negatibong bagay na sumasagi sa isip. Sa dami nga naman ng mga taong hindi napaglabanan ang temptasyon hindi maiiwasang baka ito'y mangyari sa inyong dalawa. Minsan kahit itanggi at ipagwalang bahala mo ay hindi maiiwasan ang panibugho at selos na kung tutuusin ay wala namang kongkretong basehan.
Hindi mo maiiwasan ang mga tanong na...
'Di kaya siya ay natatabangan na sa'yo?
'Di kaya nagbago na siya?
'Di kaya may iba na siyang kinagigiliwan?
'Di kaya nahuhulog na ang loob niya sa iba?


Marami na ang istorya ng pansamantalang paghihiwalay ang nauwi sa tuluyang hiwalayan, marami ring selos ang dahilan kung bakit hindi na tumagal pa ang isang relasyon marahil dahil ito sa mababaw na pundasyon ng pag-iibigan o dahil isa sa kanila ay hindi kinaya ang temptasyon at lungkot, hindi napaglabanan ang tukso at pagkaburyong, hindi natiis ang pagkainip at pagkainis sa sitwasyon.
Hindi madali ang maghusga lalo't hindi natin alam ang tunay na istorya sa likod ng malungkot na kalagayang ito. Ngunit sana maisaisip at maisapuso ng dalawang panig ang tunay na dahilan kung bakit kapwa sila nagsakripisyo, sana mapanghawakan ng dalawa ang pangakong binitiwan sa isa't isa.
Maraming dahilan upang kayo'y tuluyang magkahiwalay ngunit sasapat ang tiwala at pag-ibig niyo sa bawat isa upang hindi ito mangyari .


Kahit nasaang lugar ka pa, kabi-kabila ang dumadating na temptasyon (ngunit higit ang antas nito kung kayo'y malayo sa isa't isa) minsan ang inaakala mong kaibigan na siyang magpoprotekta sa'yo sa kapahamakan, sila pa mismo ang nagtutulak upang gawin mo ang isang bagay na hindi tama at nararapat.


Hindi dahil marami ang gumagawa, tama na ito.
Hindi dahil pangkaraniwan na itong gawain ng iba makikisali ka na rin.
May sarili tayong isip at pagpapasya upang gawin ang isang bagay na posibleng makakapagpahamak sa atin. Kahit saang lugar ay may pagkakasalang nakaabang at naghihintay lang na ito'y ating sunggaban. Mapaibang bansa man o dito sa atin, kung hindi mo kayang paglabanan ang pagsubok at hindi mo mapanatili ang pagiging matapat, bago ka pa kumawala sa sitwasyong akala mo'y simple lang hindi mo mamamalayan nalubog ka na pala dito.

Normal ang magselos ngunit sana mas mangibabaw ang pagmamahal at tiwala sa isa't isa bago pa lumala ang alitang hindi naman nakukumpirma kung may katotohanan.


Ang sakripisyong hatid ng LDR ay bunsod ng isang pangarap at buhay na pag-asa.
Katuparan ng mga pangarap ang dahilan upang mapaglabanan ang lahat ng mga bagay na gumugulo sa isip at nagpapahirap sa sitwasyon tulad ng selos, pag-aalala, agam-agam inis, inip, paghihirap, pagsasakripisyo at pagtitiis. At pag-asang may darating at sasalubong na magandang kinabukasan sa paglipas ng ilang mga taon. Na pagkatapos ng mahabang panahong ito ng paghihintay ay muling magkakasama ang dalawang taong pinaghiwalay ng pangarap.


Hindi biro ang mapuyat sa pag-iisip gabi-gabi,
o ang mag-alala sa panahong may karamdaman siya,
o ang pagbibilang ng parang baliw sa nalalabing mga buwan o taon,
o kung papaano maiibsan ang nararamdamang kalungkutan,
o ipagdiwang ng mag-isa ang mahahalagang okasyon,
o kung papaano mababawasan ang pagkasabik mo sa kanya,
o nangailangan ng karamay sa panahong ikaw ay may nakaalitan o nakagalitan,
o kung papaano masasawata ang pagluhang bigla na lamang babagsak.


Sa mga panahong ito walang ibang makakatulong sa iyong sarili kundi ang iyong pagiging matatag, ang pagpipigil sa sarili na 'wag magpadala sa emosyon, ang pangarap at pag-asang aayuda sa paggapi sa dahilan nang paghihiwalay, ang pag-ibig at pagtitiwala na hindi dapat nawawala at nababawasan.
Libong milya man ang layo ng distansya niyo sa isa't isa hindi dapat ito maging rason upang magkalayo ang inyong damdaming bumubuo ng pangarap para sa magandang umaga at bukas.


Dahil minsan hindi lang pag-ibig ang sukatan para magsama kayo ng matagal at maligaya.