Tuesday, January 21, 2014

Slaughterhouse



Bago mo pa matikman ang malutong na chickenjoy,
bago mo pa malantakan ang linamnam ng tagalog batchoy
bago pa tumulo ang sipon mo sa paghigop ng maanghang na tinola
bago ka pa maglaway sa pagngasab ng nilagang baka.


Doon sa slaughterhouse.
Gigilitan muna ng matador ang leeg ng kaawang-awang manok, kakatayin na muna niya ang umaatungal na baka at kanyang uundayan ng saksak ang walang kalaban-labang baboy. Ilulublob sa kumukulong tubig habang pumapalag-palag. Ang matador ay 'di maawa, 'di matitinag.


Lahat sila'y kikisay sa unang bigwas pa lang, walang makikinig sa kanilang panaghoy at
atungal o 'di papansinin ang kanilang labis na pagmamakaawa. Tutuyuin ang dugo 'pagdaka'y lamang-loob ay ibubukod at ihihiwalay. At ang piraso ng karne nila'y ipanglalaman sa ating mga tiyan na tila sa buong maghapon ay walang kabusugan. 

Bakit wala ni isang tumuligsa sa garapalang pagpaslang?


Galit sa kumakatay ng aso habang nginangasab naman ang fried chicken ni Mang Max's.
May panawagan pang ipagbawal na (raw) sana ang karera sa San Lazaro habang inaabangan niya ang inorder na wagyu doon sa Racks.
Magpoprotesta  ng pagmamalupit sa elepanteng nakakulong sa Manila Zoo 'di naman makatiis na lantakan ang lechong baboy na inorder from Cebu.


Nagprotesta pa noong may napanood na minaltratong cute na kuting sa FB, pikit-mata naman sa mga hayop na kinikitil doon sa slaughterhouse na kadiri.
Nais na ipagbawal ang digmaan ng texas at talisain hindi naman umaayaw sa hot and spicy chicken ng KFC.
Kritiko sa panghuhuli ng mga matatapang na pating pero madalas namang umorder ng shark's fin doon sa Henlin.


Nagmamaang-maangan. Nagtatanga-tanghan.
Concerned umano sa kapakanan ng mga hayop.
'Di niya batid na bahagi rin siya ng kahayupan.

Nagmamalinis. Walang kasalanan.
Miyembro pa ng grupong nagmamalasakit umano sa hayop.
'Di niya batid na bahagi rin siya ng kahayupan.


Isang hayop katumbas ay isang buhay que baka, manok, baboy, kabayo, elepante, aso, pating o pusa pa 'yan.
Hangga't lumalamon ka ng anumang uri ng karne, mapangahas kong sasabihin na ako,
ikaw, sila, kayo, tayong lahat kahit papano'y bahagi ng kalupitan.
O animal cruelty para magandang pakinggan. 'Wag mo nang tangkaing ito'y pagtakpan.

Silang vegetarian lang marahil ang tanging may karapatan.


Aking uulitin.
Doon sa slaughterhose. 
Gigilitan muna ng matador ang leeg ng kaawang-awang manok, kakatayin na muna niya ang umaatungal na baka at kanyang uundayan ng saksak ang walang kalaban-labang baboy. Ilulublob sa kumukulong tubig habang pumapalag-palag.
Ang matador ay 'di maawa, 'di matitinag. 


Ikaw, nakaramdam ka ba ng pagkaguilty, pagkahabag at pagkaawa?



* * *

Paborito kong ulamin ang nilagang bulalo na recipe ng aking biyenan saka kare-kare na masustansya sa sebo, isama mo pa ang sizzling sisig na pampulutan.
Kahit may alaga pa akong Rottweiler, Labrador at Siberian 'di ko matatanggi na bahagi rin ako ng kahayupan.



5 comments:

  1. Ako rin, bahagi ng kahayupan... :(
    Pansin ko lang din, wala atang may New Year's resolution na "More gulay, less meat this 2014" no?

    ReplyDelete
    Replies
    1. sigurado kasing mabibreak lang ang resolution na 'yan. sarap kaya ng fried chicken at crispy pata.

      Delete
    2. Oo nga. Aminado ako na imposible sa akin ang maging vegetarian. :(

      Delete
  2. I'm guilty as well huhuhu T_T

    I'm an animal lover specially ng mga pusa pero di ko rin mapigilan ang tawag ng laman (hops, wag berde ang utak ahahaha)... karne ng hayop!

    But, hindi rin naman kami madalas kumain ng pork or beef dito sa bahay. Siguro once or twice a week lng. More on fish at gulay kami. Healthy living ba :D

    ReplyDelete
  3. Guilty.. gustong gusto ko ng baka, baboy at manok.. madalas dati dito kumakatay sila ng baboy.. pag kakatayin na nila yun tinatakpan ko tenga ko at ayaw ko mapanood kahit ba sabihin nating hayop yun.. yung atungal ng hayop me sakit kang mararamdaman dun eh. Kung ako eh mapipunta sa lugar na puro gulay lang .. masasabi kung kaya kung mabuhay sa gulay lang.. pero syempre masarap naman kasi talaga ang fried chicken at steak. Kaya di makatangi.

    ReplyDelete