AlDub: Isang Pagsusuri

Isang penomenon at maimpluwensiya (habang isinusulat ito) ang tambalang Alden Richards at Maine Mendoza (sa karakter na Yaya Dub) o mas kilala sa tawag na Aldub at ang pagtanggi sa katotohanang ito ay katumbas ng pagsisinungaling sa sarili. Ang popularidad na ito ay umabot sa buong kapuluan at sa ibang pang panig ng mundo. Ang biglaang pagsikat ng tambalang ito ay 'di inaasahan, isang aksidenteng nagresulta at pumabor sa programa at sa dalawang nabanggit na artista.

Marahil nga ay hindi gaanong ganoon kahalaga na pag-usapan na halos araw-araw ay nakakakuha ito ng daang libo/milyong tweets at gumagawa ng record sa tuwing espesyal nilang araw na Sabado, dinaig pa nga ng mga tweets na ito ang dami ng bilang ng tweets na natala noong bumisita si Pope Francis sa Maynila noong Enero 2015. Ngunit kung susuriing mabuti ay may kakaiba rito; maraming mas nauna, mas sikat at mas popular sa tambalang Aldub ngunit bihirang mag-trend sa Twitter, worldwide. Sabihin na nating may kababawan pero hindi ba't nagrereklamo tayo sa mga paulit-ulit na gasgas na tema ng mga teleserye sa telebisyon? Hindi ba't naumay at nabanas tayo noon sa programang Wowowee/ Wowowin dahil sa nakabikining mga dancer nito at sa halatang paggamit o pagmanipula sa kalagayan at damdaming ng mga mahihirap na contestant ng nasibak na programa? Ang Aldub at Kalyeserye ay wholesome pero marami pa rin ang nagrereklamo. Sa segment na ito ng Eat Bulaga ay pinatunayang hindi kailangan ng slapstick na komedya, ng pamimintas sa kapwa para makapagpatawa, ng maraming sikat na bida para makilala, ng mabigat na script para magtrend at ng malaking budget para pumatok sa masa.

Sabihin na nating may pagkakataong nakakasawa ang segment na ito ng Eat Bulaga dahil sa paulit-ulit lang na kanilang ginagawa pero dahil sa kagiliw-giliw ang mga karakter sa likod nito isama na natin ang nakakatawang The Explorer Sisters -- riot ang kahihinatnan nito at marami pa rin ang natutuwa dito. Marami na tayong napanood at nasaksihang love teams sa telebisyon at pelikula at kahit gaano pa kasikat at kapopular ang anumang tambalan darating sa punto na ang Aldub ay mawawalan nang kinang kung hindi man kaagad malalaos. Ngunit bago pa ito mangyari kapansin-pansin na ang kanilang narating ay magmamarka na sa kasaysayan ng industriya ng showbiz. Hindi madaling sabihing magtatagal ang tambalang ito pero may kapasidad ang dalawa na tumagal at humaba ang karera kung sila'y mag-e-evolve.

Sa maikling panahon napatunayan na rin naman ng kalabang programa ng Eat Bulaga na mayroon silang ibubuga; ang mga talent search nila noon at nakakatuwang segment ay tinangkilik at nagklik sa masa ngunit sa pagdating ng Aldub mistula silang naging trying hard na pilit binabangga ang isang kongkretong pader. Ang anumang pagpipilit na kanilang gawin na gayahin ang patok na kalyeserye at tapatan ang penomenal na Aldub ay katumbas ng paglubog ng kanilang popularidad. Mas makabubutiing hindi na lang nila ito sabayan, 'wag manggaya ng konsepto, at maibalik ang dating It's Showtime na hinanap ng publiko.

Sa kabilang banda, ang tatlong buwan ng tambalang Aldub partikular na si Maine Mendoza ay gumawa ng isa pang kasaysayang (sa pagkakaalam ko'y) hindi pa nagagawa ng mga artista ng bagong henerasyon. Sa tatlong buwang ito ay nagkaroon ng anim na endorsement ng produkto si Maine, kung hindi popular ang personalidad na ito hindi ito pagkakatiwalaan ng malalaking brand ng produktong tulad ng O+, Zonrox, 555 Sardines, Talk N Text, Bear Brand at ang higanteng McDonalds. At ang bilang na 'yan na kanyang ini-endorse ay patuloy na madadagdagan sa susunod pang mga buwan. Sa loob ng maikling tatlong buwang pananatili niya sa industriya ay nakagawa na ito ng multi-milyong pisong kita na hindi nagawa ng maraming artista noong nag-uumpisa pa lang sila sa telebisyon at pelikula. Kung sakali man na hindi gaanong magtagal ang tambalang Aldub malaki-laking halaga na iyon para sa dalawanpung taong gulang na baguhang artista.

Hindi maikakaila na ang Aldub ay isang mabentang kalakal at ang mga negosyanteng nasa likod nito ay mahusay magbenta ng produkto at magaling magpatakbo ng negosyo. Ang kasikatan at popularidad ng dalawa ay nagamit nang husto dahil bukod sa mga commercial at endorsement ay magkakaroon sila ng pelikula sa darating na Filmfest. Ang pinakahuling pagtatanghal ng AldubEBTamangPanahon ay kumita ng mahigit na php14 milyon sa ticket sales pa lang kung hindi ito negosyo ano ang dapat nating itawag dito? Ang mahigit 55,000 na seating capacity ng Philippine Arena ay napuno upang masaksihan ang pagtatanghal na ito, record breaking ang 39 million tweets at tinatatayang mahigit sa 40% ang TV ratings nito. Isang pakonsuwelo para sa mga fans na ang halagang kanilang ibinayad sa ticket ay napunta sa maraming eskwelahan sa bansa upang makapagpatayo ng sarili nilang library kabilang sa benepisyaryo ng kanilang layunin ay ang tila nakaligtaan ng pamahalaan -- ang mga Lumads.

Magkaibang bagay ang entertainment industry at pulitika pero napatunayan na natin sa maraming pagkakataon na ang mga pilipino ay (halos) nagkakaisa sa mga bagay kung saan sila ay nalilibang at sumasaya gaya ng sa tuwing may laban si Manny Pacquiao at ito ngang Aldub. Sana kung mayroong pambansang isyu na dapat maresolba at pagtuunan ng pansin, magkaisa at magbuklod din tayo sa iisang adhikain. Ngunit tila hindi ito ang nangyayari sa ngayon dahil maraming fans ng magkabilang istasyon ang nagbibitawan ng masasakit na salita mapagtanggol lamang ang kani-kanilang idolo.

Nasaksihan ko mismo ang haba ng pila at masikip na traffic sa kalsada ng NLEX noong nakaraang Sabado sa pagtatanghal ng Aldub/ Eat Bulaga sa Philippine Arena, hindi biro ang pinagdaanang sakripisyo ng mga taong ito mapanood lang ang naturang pagtatanghal. Sa malaking bilang na nakibahagi sa Aldub mapa-live man o sa bahay, sana'y makibahagi rin sila bilang mga botante na makikilahok at handang magsakripisyo sa manit, sa pagkainip at sa masikip na pila sa presinto para makaboto at maghalal ng matinong pulitikong susunod na magiging lider ng ating bayan.

Bilang panghuli'y hindi tamang sabihin na ang LAHAT ng tagatangkilik ng Aldub ay mga mangmang na walang pakialam sa isyu ng bayan o mga uto-utong sunod-sunuran sa writer at producer ng naturang segment at mga walang pinag-aralan na dinidiyos ang dalawang personalidad. Sana lang ay malaman ng lahat ang kanilang limitasyon sa paghangang ito at may mas malawak na pang-unawa sa mga bagay na mas mahalaga kaysa sa pansamantalang kasiyahan.

Hindi dahil tagahanga ka ng kabilang istasyon o ng Aldub ay may karapatan ka nang husgahan ang hindi mo sinasang-ayunan, marami ang sensitibo sa sarili nilang damdamin pero insensitibo naman sa nararamdaman ng iba. Sa kabilang banda'y hindi rin dapat na magdiwang ang nasa kabilang panig dahil sa pagsadsad ng kalabang programa ng Eat Bulaga dahil maraming pamilya ang apektado nito kung sakaling ang Showtime ay tuluyang tumiklop at magsara, ang mga maliliit na taong nasa likod ng produksiyong ito ang lubusang maapektuhan -- mabibigyan niyo ba sila ng hanapbuhay at sapat na kita kung matigbak ang kanilang programa?

Madalas nating naririnig ang katagang 'Healthy Competition' pero kahit saang anggulo natin tingnan tila hindi naman healthy ang nangyayari kundi isang personalan.

Minsan hindi na natin nilulugar ang ating sarili sa dapat nating kalagyan at hindi natin naitatanong ang ating sarili kung may punto at halaga ba ang ating ipinaglalaban?